FÆRRI SKÚLADAGAR, MEN MEIRA MORGUNSANG
Broytingar eru gjørdar í fólkaskúlalógini, og onkrar teirra hava beinleiðis ávirkan á næmingarnar. Ein er, at skúladagatalið er stytt við 5 døgum, men tað merkir kortini ikki, at lærarar fáa longda summarfrítíð. Fyri skúlaárið 19/20 verða allir 5 dagarnir lagdir við skúlaársenda. Hvussu verður seinni, er endalig avgerð ikki tikin um enn, men helst verða 2 dagar tiknir av í fyrra enda og 3 í seinna enda.
Upp til 2 tímar um vikuna kunnu takast av tímatalinum hjá hvørjum flokki eftir ávísum reglum, sum eru ávegis. Ætlanin er so, at skúlin kann nýta hesar tímar í felags ráðlegginini annars.
Annað nýtt er, at morgunsangur skal vera hvønn morgun, ella sum stendur í dagførdu fólkaskúlalógini: “Stk. 3. Morgunsangur eigur at vera partur av vanliga skúladegnum.”
Higartil hevur verið so, at skúlarnir sjálvir hava gjørt av, hvussu ofta morgunsagnur er. Í Skúlanum á Fløtum er tað soleiðis nú, at á Frælsinum er morgunsangur tríggjar ferðir um vikuna, týsdag, hósdag og fríggjadag, kl. 8:00. Í Kongagøtu og Finssen hvønn morgun, kl. 9:15, og á øðrum eindum er stundum morgunsangur.
Samfelagsfrøði hevur verið royndarverkætlan farnu tvey árini, og framyvir verður fakið føst lærugreinin á tímatalvuni hjá 7., 8. og 9. flokki.
Broytingar í fólkaskúlalógini: sí Kunngerðarblaðið nr. 52 í pdf-fíluni niðanfyri.
Løgtingslóg nr.52 2019-Kunngerðablað A.pdf
